Die Sentraalstreek het in September besonder erg onder brande deurgeloop. Twee lodges, drie huise en honderde hektaar weiding is vernietig, en drie mense het erge brandwonde opgedoen. Die vermoede is dat die meeste van hierdie voorvalle brandstigting was. Dit lei dan ook tot ernstige tekorte van voeding in die streek.

Verder sien boere in die streek ook ‘n skerp toename in veediefstal waar groot getalle vee per voorval gesteel word. Diewe fokus ook op sleepwaens en dieselkarre. Tydens die inbrake word veral die toerusting in store geteiken, wat die vermoede versterk dat sindikate betrokke is wat die toerusting herverkoop.
Daar was wel vordering in Eskom-sake waar die streek nou ‘n bekwame en beskikbare persoon het om probleme op te los.

Wanneer landbou produkte se pryse langs die braaivleisvuur ter sprake kom is die prys van aartappels altyd ‘n gunsteling. Aartappels behaal tans weer rekordpryse op die markte en ons is bly vir die aartappelboere se onthalwe. Die onderwerp van die middelman wat altyd die grootste gedeelte van die wins neem, dat pryse doelbewus deur boere gemanipuleer word deur die produk van die mark te weerhou en dat boere prysnemers is, word ook uit alle hoeke beskou en daaroor kommentaar gelewer. Wat in sulke gesprekke nie altyd na vore kom nie, is dat dit oor die jare heen niks anders is as die ekonomiese beginsel van vraag en aanbod nie. Tans is die vraag hoog maar die aanbod laag. In groot gedeeltes van die Limpopo aartappelstreek het ons besonderse koue vroeg in die winter ervaar en dit het skade aan nuwe aanplantings gebring wat nou tot produksie tekorte lei. TLU SA het ook in die begin van die winter gewaarsku dat daar ‘n tekort gaan kom. Ons kan argumenteer soos ons wil, die natuurwette bly natuurwette, so sal ekonomiese beginsels van vraag en aanbod altyd met ons wees.

Ons sitrusboere het baie probleme ervaar met die uitvoer van hulle produk, weens die probleme by die Durbanse hawe, skynbaar weens rekenaarstelsels wat gekaap is. Dit het tot gevolg gehad dat sitrusboere hulle duur uitvoervrugte op die reeds oorvol plaaslike mark moes verkoop, graad een lemoene kon by die meeste vrugte- en groente groothandelaars teen minder as R40,00 per 7kg sakkie gekoop word. Die ekonomiese beginsel wat plaaslik vir die aartappelboere gewerk het, het ongelukkig hier teen die sitrusboer gewerk.

Veldbrande is weens die goeie reënval wat hoë digte gras tot gevolg gehad het ‘n groot probleem en brandstigting, veral langs die N1, het ook vanjaar toegeneem. Die Noordstreek het met SANRAL in briefwisseling gepleit dat SANRAL moet verseker dat hulle subkontrakteurs oor die regte toerusting beskik, veral om droë gesnyde gras te hanteer. SANRAL is ook versoek om hulle grassny skudules te wysig sodat geen gras in die padreserwes gesny sal word in die droë en winderige seisoen nie.

In die Oos- en Natalstreke is boere hard besig met voorbereiding voordat die plantseisoen aanbreek. Dit is egter vir die boere opmerklik hoe die insetkoste sedert die vorige seisoen met tot 50% gestyg het. Dit bemoeilik finansiering wat reeds ‘n uitdaging is en sal noodwendig gevolge hê in die verskaffing van landbouprodukte.

Dit is verblydend dat boere in die Oostelike streek Kobus Oberholster van TLU SA se Landbou Sektor Voorsorgfonds baie goed ontvang het. Soveel boere besef nie hoe belangrik goeie finansiële beplanning vir ‘n boerdery is nie, selfs nadat die eienaar tot afsterwe kom. Enige belangstellende lede in enige van die streke kan die hoofkantoor skakel om met Kobus in verbinding te tree.

In Mpumalanga het die streek in samewerking met AFASA en Mpumalanga Landbou daarin geslaag om die provinsiale polisiekommisaris te nader met die oog op ‘n vergadering om veiligheidskwessies te bespreek. Dit is ‘n goeie stap vorentoe om bande met die SAPD te bou.

Ronnie Schilling, die streeksbestuurder wil spesifiek sy dank uitspreek aan die groep boere wat ten spyte van hierdie uitdagings steeds voortgaan om te boer en te voorsien in voedsel vir die land.

Jannie Raath, die bestuurder van Noordwes en die Vrystaat was vandeesmaand by die rampbestuurforums betrokke en vergader binnekort met die LUR en premier van Noordwes oor veldbrande. Dit is veral munisipaliteite se versuim om deel te vorm van brandverenigings soos bepaal deur die Brandwet en ‘n tekort aan brandweerdienste wat bespreek sal word. Die voorstel is dat munisipale regerings solank begin om paaie te skraap in die stryd teen brande, en dan verder doen wat nodig is.

Die dieregesondheidforum is weer op die been en die predasieforum begin ook aan die gang kom. Dié forums is dit eens dat veeartse wat in beide van die forums se behoeftes kan voorsien, dringend nodig is.

Veediefstal het in hierdie streke ook buitensporig toegeneem met tot 100 skape wat per keer gesteel word. Die Vrystaatse polisie, RPO, Vrystaat Landbou en TLU SA het nou ‘n strategie van stapel gestuur wat op kleiner plekke soos Fouriesburg reeds positiewe resultate afwerp.

Jannie noem dat die noue samewerking met Agri Noordwes baie goeie resultate lewer.

Daar is verskeie organisasies en besighede wat na TLU SA en sy lede uitreik met ondersteuning. Uiteraard het elke lid verbintenisse met bestaande instansies waarmee besigheid gedoen word. Hierdie instansies word gereeld in ons sosiale blaaie bekendgestel. Dit sou billik wees indien ons lede ten minste vir hulle ’n kans gee om ook ’n kwotasie te gee indien daar in die spesifieke rigting besigheid oorweeg word. Kom ons maak ons borge se hande sterk sodat ons ’n lang pad met hulle kan stap.

Vandeesmaand bedank ons graag al die borge wat ons Kongres moontlik gemaak het:

Diamant

Platinum

Goud

Silwer

Brons

Die stand van Suid-Afrika se water is onaanvaarbaar. TLU SA het ‘n veldtog van stapel gestuur om die departement van water en sanitasie te dwing om die kwaliteit van ons waterbronne te verbeter. Deel van die veldtog is om voorbeelde van die vuil water te versamel om dit aan die departement voor te lê. Indien die departement en munisipaliteite nie binne ‘n sekere tydperk daarin kan slaag om ons waterbronne te herstel nie, sal TLU SA daarop aandring dat privaatinstellings hierdie taak oorneem.

Steun TLU SA se waterveldtog deur vir ons ‘n foto van jou vuil water te stuur.

Ondersteun die veldtog hier: klik hier

Vyand Nommer Een van Veiligheid

Onder die “waaksame” oog van die minister van polisie, Bheki Cele:

1. Kan die polisie glad nie naspoor waar hulle amptelike vuurwapens is nie.
   
2. Ongeveer 8 miljoen bewysstukke – heelwat daarvan uit grusame plaasaanvalle – is ook onder sy leiding verlore.
   
3. Met Cele as die voorbeeld word ‘n polisiebrigadier in KwaZulu-Natal tot generaal-majoor bevorder tien jaar nadat 98 wapens onder sy bestuur weggeraak het.
   
4. Speurders moet uit hulle eie sakke betaal vir toerusting, vervoer en uniforms en dit beïnvloed hulle werk. 
   

Cele is in 2011 as polisiekommisaris ondersoek en geskors nadat bewyse oor korrupsie en wanbestuur aan die lig gekom het, maar eers in 2013 afgedank terwyl sy salaris van R1,3 miljoen steeds betaal is.

Die skelm sal altyd korrup wees en moet tsamaea!

Wat doen TLU SA

Sodra ons genoeg ondersteuning ontvang het, sal ons die Parlementêre Portefeuljekomitee oor Polisie nader en versoek dat Minister Bheki Cele uit sy pos ontslaan word.
Volg hierdie skakel om die veldtog te ondersteun: Klik hier.