Dele van die provinsie is dankbaar vir welkome reën wat die afgelope tyd geval het. Die droogte is egter op sommige plekke nog nie gebreek nie, en talle riviere het nog nie begin loop nie, damme word nie vol nie en boorgate is steeds onder druk.
Ons boere bly egter positief en kyk met verwagting en vertroue vorentoe. |
Erna Duvenhage, jarelange en getroue sekretaresse van Vaalwater DLU, en haar man Pieter, is deur ‘n baie moeilike tyd nadat hulle hul seun in die fleur van sy lewe verloor het na ‘n kort siekbed.
Thabazimbi DLU voorsitter, Pieter Welgemoed, het sy moeder aan die dood afgestaan.
Nico en Isabel Kilian van Schweizer- Reneke het hul seun in 'n motorongeluk verloor.
Ons dink aan hierdie families in hierdie moeilike tye en bid hulle God se vertroosting toe. |
Veilings is weer volstoom aan die gang regdeur die provinsie, nadat die Minister van Landbou die verbod op die veilings opgehef het nadat bek- en klouseer verlede jaar in die provinsie uitgebreek het.
Dit was ‘n baie swaar tyd vir boere wat skielik nie hulle diere na veilings kon neem soos hulle beplan het nie. Omdat die provinsie in ‘n knellende droogte vasgevang was op heelwat plekke, is boere gedwing om diere langer op die plaas aan te hou en meer voer te koop, en het hulle kontantvloei onder erge druk geplaas.
In die tyd van veiling-stilte, het veilinghuise seker gemaak dat hulle die bio-sekrutiteitsmaatreëls in plek gestel het, en toe die minister die verbod ophef, was die eerste veilings al twee dae later gehou.
Boere is baie verlig dat sake weer normaal kan voortgaan, alhoewel daar steeds kommer is dat die siekte weer kan uitbreek omdat die gevoel daar is dat die regering nie voldoende doen om die sogenaamde rooi gebied te beveilig en te voorkom dat diere daarvandaan in skoon gebiede inkom nie. |
Die gesegde ‘Woorde wek maar dade trek’ het weer baie duidelik geword tydens ‘n funksie wat die Ellisras Boerevereniging aangebied het. Hulle het die hele gemeenskap genooi na ‘n Saterdagmiddag funksie (op dieselfde dag dat die Jongboerkonferensie ook in Noordstreek gehou is) om TLU SA bekend te stel.
Streeksvoorsitter Henk van de Graaf het TLU SA se werksaamhede verduidelik, sekretaris Gert du Plessis het gepleit vir ‘n Ellisras Forum waar alle organisasies kan saamwerk rondom plaaslike kwessies, en voorsitter Johan van Vuuren het ‘n pleidooi vir betrokkenheid by die BV gelewer.
Drie skape is op die spit gebraai, en ‘n plaaslike orkes het heerlike musiek gemaak en die gemeenskap het boeregasvryheid beleef en geniet.
Die resultaat: Tien nuwe lede wat aangesluit het. Welgedaan, Ellisras BV! |
