Die Noord-Streek het ook ‘n tyd van erge droogte deurgegaan, en baie boere het besonder swaar gekry.
Reën het wel plek-plek begin uitsak, maar die droogte is nog nie gebreek nie. In sommige gebiede het dit baie min gereën, en op talle plase is boorgate nou onder druk. Daar is al selfs plekke waar spilpunte tot stilstand geknars het omdat die ondergrondse water nie meer genoeg is nie.
|
Vanuit Potgietersrus se kantoor is ywerig saamgewerk met VLU in die Boks vir Boervroue. Etlike tonne bokse met benodigdhede vir boervroue is daar afgelaai, en weer versend na die Kaapse gebiede waar die nood hoog was.
Die land se gemeenskappe het sodanig die veldtog ondersteun, dat daar selfs ‘n surplus was, en ook vroue in die droogtegeteisterde gebiede van ons eie provinsie, kon ‘n aangename meevallertjie kry net voor Kersfees.
Dankie aan al die donateurs, en dankie aan Renita Prinsloo in Potties, wie se huis vir ‘n ruk lank propvol bokse was, en die skitterende wyse waarop sy die projek van TLU Noord se kant hanteer het. |
Die bek-en-klouseer het veral in Noordstreek geweldige nadelige gevolge. Baie van ons DLU’s besit veilingskrale of aandele daarin, en deurdat alle veilings opgeskort is, het die inkomste ook opgedroog en moes noodmaatreëls al ingestel word om kantore oop te hou.
Talle boere het in die posisie beland dat hulle nie meer hulle vee kan bemark nie, met die gevolg dat hulle ook kontantvloei probleme ondervind, en sukkel om maandelikse verpligtings na te kom.
Van die regering se kant word daar feitlik niks gedoen om die probleem op te los nie, met die gevolg dat dit weereens die boer is wat alleen die spit moet afbyt. Geen padblokkades word gehou nie en die besmette gebied word ook nie afgesper en gekontroleer nie.
Hoe lank die probleem gaan voortduur, is ‘n ope vraag. Intussen het daar wel reeds verskeie katalogus veilings plaasgevind, maar die nadeel daarvan is maar altyd dat diere nie fisies daar is om te inspekteer nie. En ‘n boer se oog sien op die hoef baie meer as op ‘n foto. |
