Die virtuele protesoptog van 14 Augustus 2020 om plaasaanvalle te herdenk was ‘n groot sukses – benewens die bykans 12 000 persone wat geregistreer het, het meer as 355 000 op een of ander manier direk kennis geneem van die geleentheid. Hierdie kennisname was nie tot Suid-Afrika beperk nie, want talle individue en nuusagentskappe in die buiteland het navraag gedoen. Daarbenewens het kosbare en roerende herinneringe na vore gekom en kon die lot van meer as 2 000 slagoffers wat vermoor is, asook die emosionele herlewing van beserings en ervarings van diegene wat by die 5 530 gedokumenteerde aanvalle tussen 1 Januarie 1990 en 31 Julie 2020 betrokke was, op ‘n eerbiedige wyse herdenk word.
|
Daar is etlike instansies wat insidente wat aan die bestaande definisie van ‘n plaasaanval voldoen, byhou. Uiteraard verskil hierdie data en is daar nie noodwendig ‘n waterdigte ooreenstemming nie. Selfs TLU SA se data vir die afgelope verslagperiode van die SAPD dui op ten minste tien meer moorde as wat in die SAPD se statistiek bekendgemaak was. Kennis moet egter geneem word van toenemende buitelandse belangstelling wat in Suid-Afrika gebeur en dit maak dit toenemend belangrik dat die partye se data wedersyds ondersteunend en bevestigend sal wees. Dit sal verhoed dat een party nie teen ‘n ander afgespeel kan word nie. ‘n Eensgesinde meerderheidsverskil met die amptelike statistiek van die regering sal inderdaad groter geloofwaardigheid en derhalwe ook gewig in die buiteland dra.
|
Die tyd het aangebreek dat die ooglopende vraagtekens oor twee kritiese kwessies deurtastende ondersoek verg. Dit is allerweë bekend dat die vlakke van geweld wat teen slagoffers van plaasaanvalle toegepas word, ver buite verhouding staan met betrekking tot die ooglopende motiewe vir die aanvalle. Geen vuurwapen, selfoon, kontant of wat ookal regverdig die blatante wreedheid wat in talle gevalle koelbloedige marteling en ontmensing van slagoffers insluit nie. Daarbenewens gebeur dit telkens dat die aanvallers in groepe optree wat dikwels afkomstig is uit gebiede ver verwyder van die teikengebiede wat aangeval word. Tussen die twyfelagtige motiewe, is daar ‘n sterk element van georganiseerde misdaad en meer as ooit vantevore, raak dit indringend noodsaaklik dat die misdaadondersoek komponent van die SAPD ook spesifieke aandag skenk aan beide “motief” (wat veel verder strek as net diefstal, roof, ernstige aanranding, verkragting en moord) asook die georganiseerde aard van die groepe wat vir hierdie misdade verantwoordelik is. Plaasaanvalle, wat immers dieselfde status as ‘n “Nasionale Prioriteitsmisdaad” soortgelyk aan in transito-roof en politieke moorde (en etlike ander misdade) geniet, verdien dieselfde toewysing van personeel, logistiek en misdaadintelligensie wat tot nou nie ‘n voorkomende rol kon speel nie.
|
Boere kan gerus kennis neem van die feit dat TLU SA by etlike geleenthede die konsep van “Landbouvriendelike SAPD Reserviste” met die Nasionale Kommissaris en senior adjunk kommissarisse opgeneem het en dat die konsep simpatiek aangehoor was. In hierdie verband word voorgestel dat boere wat betrokke wil raak, in eie gebied, met eie voertuig en vuurwapen en onderskeibaar deur ‘n oorbaadjie op kort kennisgewing telefonies “In-Diens” gestel kan word. Die behoefte in landbougebiede is spoedige dog korrekte reaksie om lewens te spaar. Toepaslike opleiding kan op SAPD stasie-vlak en deur middel van afstandsonderrig aangebied word. Daarbenewens kan effektiewe bevel-en beheer deur middel van “Senior Sektor Reserviste” bewerkstellig word. |
