Plaasaanvalle op rekord dateer uit die middel tagtigerjare. Ongeag die feit dat dit in die laat negentigs, vyf jaar nadat die nuwe staatsbedeling in werking getree het, as ‘n Nasionale Prioriteitsmisdaad verklaar is, het die geweld net toegeneem en word landbouers, hul gesinslede asook plaaswerkers steeds daaraan onderwerp.
|
Die onbetwisbare gebrek aan onmiddellike ondersteuning wanneer gevaar dreig, noop landbouers en plaasbewoners om effektief te kan optree om eerstens lewe en liggaam te beskerm en dan om te sien na die veiligheid van eiendom hetsy die grond, produkte/lewende hawe, gereedskap en installasies te beveilig.
|
Die impak van die Inperkingsmaatreëls het aanvanklik ‘n merkbare daling in beide aanvalle en moorde getoon, maar daardie tendens het na net ‘n paar weke skerp gestyg en ongeag die voortdurende beperking op beweging en aandklokreëls, is die vlak van gewelddadige misdaad op plase en hoewes reeds effens hoër as voor die afkondiging van die inperking. Daarmee saam het die diefstal van lewende hawe, produkte, gereedskap, onderdele, sonpanele en installasies wat verhandel kan word, drasties toegeneem.
Die Veiligheidsbesture van TLU SA en Agri SA is tans in afwagting van bevestiging van ‘n gesamentlike gesprek met die Minister van Polisie, die Nasionale Kommissaris en die Afdelingskommisaris: Sigbare Polisiëring.
|
