Baie dankie aan al ons borge wat die 2024 Jongboer-Konferensie vir ons moontlik gemaak het. Julle laat landbou leef!

Agri Skills Transfer het tesame met TLU SA ‘n Jongboer van die Jaar beurskompetisie vir 2024 by die TLU SA Jongboer-Konferensie geloods. 

Die kompetisie bied ‘n uitsonderlike geleentheid vir jongboere om hul stemme oor die toekoms van boerdery in Suid-Afrika te laat hoor. Ses beurse vir aanlynkortkursusse van Agri Skills Transfer, wat jongboere sal help om hul vaardighede te ontwikkel en hul loopbaan in die landboubedryf te bevorder, kan gewen word.

Jongboere word genooi om ‘n opstel van 400 woorde wat die toekoms van boerdery in Suid-Afrika uitbeeld te skryf.

Inskrywingsvereistes: 

• Die opstel moet in Afrikaans geskryf word. 
• Beperk die opstel tot 400 woorde. 
• Inskrywings moet teen 15 April 2024 ontvang word. 
• Inskrywings moet per e-pos gestuur word na Mariëtte Minnaar by sekretaresse@tlu.co.za

Beoordeling: 

• Die inskrywings sal deur ‘n paneel van beoordelaars op kreatiwiteit, insig, en taalgebruik beoordeel word. Die ses mees indrukwekkende opstelle sal elk ‘n beurs vir ‘n aanlynkortkursus van Agri Skills Transfer ontvang. 

Dit is ‘n unieke geleentheid vir jongboere om hul idees oor die toekoms van boerdery te deel. Ons sien uit na julle deelname en inspirerende bydraes! 

Vir enige navrae of verdere inligting, kontak asseblief Laurika du Bois by laurika@agriskills.net of Mariëtte Minnaar by sekretaresse@tlu.co.za

1. Projekte in die Oos/Natalstreek 
   Ons weet dit is nog vroeg, maar hier aan die begin van die jaar waar al ons boere baie besig is, gaan ‘n ding so maklik by ‘n mens verby.
   
   Ons kondig graag aan dat die Oppi-Plaas Fees in Dullstroom plaasfind op 15 en 16 Junie 2024. 
   
   Die landbou gedeelte word deur TLU SA gereël en die fees beloof om vanjaar nog ‘n groter sukses te wees as die vorige jaar. Moet dit nie misloop nie! 
   
   Vir enige navrae, kontak gerus vir Ronnie Schilling op 083 642 7230 of Retha Gibbon op 084 860 4759. 

2. Gewasse
   Ons is, soos in die res van die land, uiters bekommerd oor wat die mielie en soya opbrengste gaan wees. Daar is dele in die Oos/Natalstreek waar dit bitter droog is en dit het ‘n baie ernstige nadelige invloed op hierdie gewasse. 
   
   Die vreeslike hitte het ook met haelstorms gepaard gegaan en sommige van ons boere se totale oeste is vernietig. ‘n Mens sou verwag dat boere deur hierdie gebeure platgeslaan gaan wees, maar van die provinsiale kantoor af kan ons sê dat ons boere se gemoedere steeds hoog is. Soos by TLU SA, gee ons dit oor aan die Vader. 

3. Algemene nuus 
   Lede moet die media dophou vir komende boeredae soos: 
   • Val Boeredag 
   • Wonderfontein Boeredag 

   Kom breek weg vir ‘n wyle en vergeet vir ‘n oomblik van al die negatiewe. Herlaai vir die jaar se menigte uitdagings.  

Landbou groete hier uit die Oos/Natalstreek 

Elke DLU lid, man, vrou en kind.

Neem asseblief drie minute en lees die boodskap van ons DLU voorsitter, Hendrik Botha. Dis kardinaal dat ons dit elkeen weer opnuut deel van ons gesin maak.

Wanneer mens rondkyk en die verterende son se uitwerking op voorheen belowende oeste sien, om nie eers te praat van al die politieke onheil en vernederende diskriminasie teen ons mense nie, is dit moeilik om Habakuk 3 te lees, te verstaan, en te gehoorsaam. En aan te hou glo dat alles sal regkom.

Gelukkig is daar dan nog 'n klomp bladsye wat ons kan omblaai om by die Nuwe Testament uit te kom. Want "kyk", so het 'n ou tannie van ons gemeenskap my eenmaal geïnspireer, "Kyk man, daar is nie ‘n vraag of kwessie waarvoor daar nie vir ons baie antwoorde in die Bybel te kry is nie. Jy moet hulle net soek. En hoe meer jy soek, hoe makliker kry jy hulle."

Ek wil graag vandag enkele woorde van inspirasie, dank en bemoediging aan ons hele gemeenskap bring. Omdat Jesus Christus vir ons aan die kruis gesterf het, en ons dit net hoef te glo, is ons verseker van 'n ewige lewe. Watter aardse omstandighede rondom ons kan ons hiervan beroof? Geen enkele ding nie.

Ek merk op dat daar tussen ons mense is wat uit menslikheid moedeloos word. Kom ons vat mekaar se hande en tel mekaar op in hierdie tyd.

Baie, baie dankie aan almal wat probeer, wat meer as hul kant bring. Julle weet wie julle is, julle is van graniet en yster aan mekaar gesit en 'n reuse plesier om mee saam te werk.

Julle besef dit nie altyd nie, maar julle is die inspirasie en motivering vir die betrokkenes om te verander en ons span nog sterker te maak.

Ek het elke jaar die twyfelagtige voorreg om vir vyf weke in 'n verre eerstewêreldland deur te bring. Elke keer oor 25 jaar wat ek dit gedoen het, het ek trotser op my herkoms en Afrikanerwortels geword. Om nie eers te praat van wat my mense in uitdagende omstandighede vermag nie. Daar is nêrens in die wêreld nog so 'n voorbeeld nie en daarom kan dit net die Almagtige God se hand wees wat ons dra. Daarvoor kan ons nie anders as om innig dankbaar te wees nie.

Ek wil vir almal vra, HOU UIT. Dit sal weer beter gaan.

As jy reeds baie van jou sweet vir die voortbestaan van ons unieke gemeenskap bydra, doen meer. As jy nog moet betrokke raak, dit is vyf minute voor 12, jy kan nog 'n verskil maak.

Groete
Hendrik Botha

Elkeen moet aandag aan sy/haar eie finansiële beplanning gee, en daarom is dit ook belangrik dat TLU SA deelneem aan inisiatiewe om bekostigbare aftree-, ongeskiktheid-, sterfte- en begrafnisvoordele vir plaaswerkers te voorsien.

Die Agri en Verwante Sektore Voorsorgfonds (“die Fonds”) bied verskeie bekostigbare planne met unieke voordele aan werknemers.

Die Raad van Trustees het goedkeuring verleen dat die huidige bydraeplanne wat onder die Fonds aangebied word, vanaf 1 Maart 2024 gewysig word soos uiteengesit hier

Vir meer besonderhede kontak Ben de Jager.

E-pos: ben@verso.co.za

Sel: 071 495 3333

Ons boerderye ervaar daagliks baie groot druk. Boere moet betyds en so effektief as moontlik bestuursbeginsels toepas en dink hoe die situasie te oorbrug. Elke plaas is ‘n besigheid in eie reg. Daar is nie een stel reëls wat by almal pas nie en boere moet nou kyk wat hulle kan doen om hierdie gevaar te oorbrug. 

Dalk sal boere moet vee verminder en dit is baie belangrik om dit betyds te doen. Daar moet ook met finansiële instellings gesprek gevoer word sodat daar saam ‘n plan beraam kan word om hoë insetkostes te oorbrug en in produksie te bly. 

Met hierdie harde realiteit wat aan sommige boere se deur klop gaan ons vanjaar beslis boere met ‘n negatiewe gemoedstoestand teëkom. Daarom wil ons dit weer onder ons lede se aandag bring dat daar in verskillende distrikte affiliasies is met programme wat minstens twee keer per week uitreik om boere te toets en traumabystand te bied waar nodig. Die doel is om ons boere se behoeftes betyds te identifiseer sodat die regte en nodige ondersteuning deur die traumanetwerk en traumaberaders aangebied kan word,  volgens ‘n ooreenkoms wat met AfriForum gesluit is. 

Ten midde van dit alles kan ons net vir mekaar sê dat ons moet bly vashou aan ons geloof. Iemand het eens vir my gesê: “Die oeste is verby, maar ons kan bid dat ons net ons geloof behou.” Met daardie fondament weet ons waar om antwoorde en krag te kry. Dit gee ook vir ons die gemoedsrus om te weet dat ons Skepper ook tydens hierdie moeilike toestande in beheer. Kom ons maak menslik gewys die planne wat ons kan maak, maar ons doen dit in ‘n vaste geloofsvertroue vir die pad vorentoe. Kom ons ondersteun mekaar om te verseker dat ons nie eendag met ‘n leë plaas langs ons sit omdat ons bure nie meer daar is nie. Kom ons staan mekaar by en versterk mekaar ook tydens hierdie moeilike jaar se finansiële en emosionele ervarings. 

Ons moet onderskei tussen dit wat opgaan in rook en dit waaraan ons iets kan doen. Kom ons staan mekaar by in vaste geloof en maak die beste planne denkbaar om die uitdagende kwessies te oorbrug en te verseker dat ons praktyke tot en met die volgende reënseisoen sal bly staan.  

Geskryf deur Bennie van Zyl, TLU SA Hoofbestuurder

Dit is vir TLU SA belangrik dat lede so ingelig is as moontlik is oor wat in die land aangaan. Daarom deel ons van nou af artikels – met betrekking tot landbou en ons boere – wat vir verwysing in die Staatskoerant gepubliseer is.