In die Vrystaat kan ons met trots rapporteer dat die Ventersburg SAPD reaksie groep goeie vrugte afwerp. Daar word suksesvol opgetree teen die onwettige jag met honde. Groot dank ook aan Kol. Van Zyl, Kol. Gelderblom en Kaptein Odendaal van SAPD.

In Noordwes is ons deel van die Provinsiale veediefstal forum wat hierdie maand vergader het. Die kwessie oor die jag met honde word nasionaal as ’n probleem beskou en die vervolgingsgesag en staatsaanklaers is in hierdie gesprek betrek om suksesvol te kan vonnisse oplê.

Ons wil lede asseblief. versoek om ekstra maatreëls in te stel teen veediefstal oor die feestyd. Rapporteer onmiddellik verdagte insidente of gedrag aan jou plaaslike veiligheids of reaksie groep.

Baie sterkte ook vir die boere wat moet plant.

Lede kan gerus met my - Jannie Raath 0792460013 - gesels indien hulle ’n versugting van TLU SA af het.

Op 3 Desember het TLU SA Natalstreek erkenning aan ’n aantal lede van die SAPD, wat verbonde is aan ’n spesiale taakspan vir die ondersoek en bekamping van geweldsmisdade in KZN, gegee. Die geleentheid is bygewoon deur TLU SA President, Mnr. Henry Geldenhuys, die bestuur van TLU SA Natalstreek, verskeie lede van die boere-gemeenskap en media. TLU SA Natalstreek is bewus van die uitstekende werk wat die groep onderleiding van Brigadier Mbele, KZN Provinsiale Hoofkantoor, ressorteer.

In sy toespraak het Mnr. Mort Mortassagne, Nasionale Voorsitter van TLU SA Veiligheidskomitee, klem gelê op die belangrikheid van samewerking tussen die SAPD en landbou-organisasies op veiligheidsvlak. Hy het ook die lede individueel bedank vir elkeen se besonderse bydrae in die ondersoek en bekamping van geweldsmisdaad. Lede is vereer met ’n sertifikaat van waardering en daar is ook aan Brigadier Mbele en die bevelvoerder van die taakspan ’n baie toepaslike trofee oorhandig. 

TLU SA Natalstreek is van mening dat erkenning gegee moet word aan wie dit toekom. Ons beskou die gebaar as uitreiking na die SAPD vir samewerking op ’n veiligheid terrein.

GEWASSE
Ek dink ons kan met veiligheid sê dat ten minste 95% van ons boere in Oos- en Natalstreek hulle somergewasse in die grond het. Hoewel daar gedeeltes is wat steeds deur droogte geteister word, is goeie reënval in die grootste gedeeltes van beide streke gemeet.

Met ’n vinnige kyk, ons boere is baie dankbaar vir die reën wat geval het, inbrake op plase en veediefstal bly ’n probleem en daar is twee grondeise vir Gauteng in die Staatskoerant gepubliseer en plaasbesoeke is op sewe bestaande eise gedoen.

Heelwat boere is deur die Streekkantoor gehelp om hul aansoeke vir brandmerke te bekom. Indien daar nog lede is wat ’n aansoek ingedien het en nog geen brandmerk ontvang het nie, kan hul die aansoekvorm en bewys van betaling deurstuur na sentraal@tlu.co.za tesame met ’n ID afskrif. 

Die streekkantoor sluit op Woensdag 15 Desember 2021 en open weer op 10 Januarie 2022.

Boodskap van Derick Kuun, Streekvoorsitter: Sentraal:  Dit was in baie opsigte weer ’n uitdagende jaar vir boere en ons het medelye met almal wat geliefdes aan die dood afgestaan het. Baie dankie aan elke lid wat hierdie jaar ten spyte van al die uitdagings, steeds aanhou boer. Dankie vir elke lid wat deelneem aan veiligheid inisiatiewe in die onderskeie gebiede en reageer wanneer daar hulp benodig word. Die waarde van georganiseerde landbou kom telkens na vore wanneer daar krisisse ontstaan. Aan elke bestuurslid, dankie dat jy tyd afstaan aan jou boere-unie en aan elke lid, dankie vir jou ondersteuning aan TLU SA.  Mag jul en jul families ’n Geseënde Kersseisoen beleef.   

Mnr. Bennie van Zyl, Hoofbestuurder, en Jannie Roux (Streeksvoorsitter) het onlangs ’n week in die streek spandeer en groot doelwitte vir TLU SA bereik. In Garies en Strydenburg is boere-unies gestig en in verskeie van die dorpe is daar groot ontvanklikheid vir sulke strukture in die nabye toekoms.

In Springbok het ons met plaaslike organisasies gepraat oor die grootskaalse stroping van vetplante in die Namakwaland, ons was ook vinnig in Porterville in die Wes-Kaap.

Dit was omtrent ’n besige week en wat uitgestaan het, is die volgende:

• Daar is groot dankbaarheid vir die hulp wat TLU SA se Traumafonds lewer – ons vra dat mense asseblief aanhou skenk waar moontlik, alles word uitgedeel en niks word teruggehou nie.
• Mense het ’n behoefte om te weet hulle is nie alleen nie en dat die land agter hulle staan.
• Mense wil betrokke wees en daarom het ons 17 nuwe lede met Presidentlidmaatskap gewerf. Ons maak staat op hul integriteit om te sê wanneer hulle in posisie gaan wees om lidmaatskap te betaal. So het ons lede vir die toekoms.

Daar het heelwat reën geval en daarvoor is ons dankbaar. Daar is egter nog streke wat onder ramptoestande gebuk gaan. Ons bid vir hulle.

Die huidige stand van sake is reeds onaanvaarbaar en die nare realiteit is dat met die feesseisoen om die draai gaan veediefstal getalle toeneem. 
Boere gaan moet bereid wees om gedurende die feesseisoen ekstra maatreëls in plek te stel om diefstalle te voorkom.

Hulle moet – en dit is van kardinale belang – by hulle plaaslike veiligheidstrukture inskakel. Sou hulle sake aanmeld moet hulle deurlopend met die ondersoekbeampte kontak hou tot die saak deur die hof gevoer word.

TLU SA wil graag daar wees om boere by te staan met praktiese raad en moontlike bronne in die stryd teen veediefstal. Vir meer besoek https://tluveldtogte.co.za/veediefstal/

TLU SA doen ’n beroep op Suid-Afrikaners om 10 medeburgers in te lig oor wat presies OSV beteken, die impak daarvan en hoekom dit nie deurgevoer mag word nie.

Daar is steeds ’n groot mate van onkunde onder Suid-Afrikaners oor wat die Onteineningswetsontwerp behels en die impak daarvan veral die op langtermyn. Inwoners van die land moet weet dit is nie net ’n landbouprobleem nie. Dit is ’n Suid-Afrika probleem.

Kyk gerus hierdie video.

Ondersteun die veldtog hier: klik hier