proagri

Mediaverklaring: TLU SA daag: Bewys gronddiefstal en kry R100,000

TLU SA se Uitvoerende Komitee het besluit dat hy behoorlik moeg is vir beskuldigings dat boere die land se grond gesteel het en dat dit die rede is waarom al meer stemme opgaan vir die onteiening van grond sonder vergoeding.

Mnr. Louis Meintjes, President van TLU SA, sê dat daar vir eens en vir altyd duidelikheid oor die saak gekry moet word.  “Daar word alewig allerhande vae beskuldigings gemaak in die verband, maar nog niemand kon met enige konkrete bewyse van gronddiefstal vorendag kom nie.

 

“Daarom het TLU SA besluit om ‘n beloning van R100,000 aan te bied aan enigiemand wat bo redelike twyfel kan bewys dat enige kommersiële boer of lid van TLU SA sy grond wederregtelik bekom het, wat diefstal sou kon uitmaak,” sê mnr. Meintjes.

 

Mnr. Meintjes het bygevoeg dat eiendomsreg stabiliteit verskaf en die basis is vir ekonomiese groei.  “Sonder gesonde eiendomsreg sal alle ander regte ook bloot verval.  Tog word ons eiendomsreg met ’n leuen van ‘diefstal’ ernstig bedreig, terwyl daar geen bewyse bestaan dat enige grond ‘gesteel’ is nie. Almal wat glo in ekonomiese groei, werkskepping en armoede verligting, moet daadwerklik nou saamstaan en die ernstige bedreiging van populêre leuens weerstaan.  Moet nie toelaat dat die leuen aanhou om die rigting te bepaal nie.”

 

Mediaverklaring: Onmiddellike polisie-optrede geëis

Die feit dat die naaste boer se huis afgebrand is in Coligny nadat twee mense borgtog gekry het, is totaal onaanvaarbaar en TLU SA eis dat diegene wat skuldig aan brandstigting is, onmiddellik opgespoor en gearresteer moet word.

 

TLU SA se President, mnr. Louis Meintjes, sê dat sulke optrede absoluut nie geduld kan word nie.  “Dit is verregaande dat ‘n bende gewoon reg in eie hande neem, en dit nogal terwyl die slagoffer niks met die hele hofsaak te doen het nie.  Dit kom bowendien op minagting van die strafregstelsel.”

 

Mnr. Meintjes eis dat die polisie die dader op staande voet moet opspoor en toesluit, en aangesien hulle skynbaar geen respek het vir die regstelsel nie, moet hulle daarom ook geensins in aanmerking kom vir borgtog nie.

 

“Intussen moet die regering kennis neem dat geen wetsgehoorsame landsburger hoef toe te sien hoe sy lewe en eiendom bedreig of vernietig word nie, en as die regering en sy veiligheidsmagte nie kans sien om wet en orde te herstel en te handhaaf nie, moet hulle die reg van wetsgehoorsame burgers om lewe en eiendom te beskerm, respekteer,” sê mnr. Meintjes.

 

“Hierdie optrede is nie tot Coligny beperk nie,” sê hy.

 

Mediaverklaring: Tegnologie beskikbaar vir veiliger plase

Die misdaad aanslag wat ervaar word op plase strek baie wyd.  Buiten die onaanvaarbare hoë plaasaanvalle en daarmee saam die moorde wat gereeld in die media rapporteer word, is boere onderhewig aan verskeie ander onaanvaarbare misdaad wat gepleeg word.  Hier kan o.a. gedink word aan veediefstal en ander produkte, diefstal van toerusting, gereedskap en insetmiddele, betreding, brandstigting en onregmatige besettings.

 

Verskeie instansies nader TLU SA van tyd tot tyd met verskillende produkte wat aangewend kan word om sodanige misdaadaanslag die hoof te bied.  Sommige as vroeë waarskuwing terwyl ander dit probeer verhoed.

 

TLU SA is besig om ‘n opname te doen oor produkte wat eerstens vroeë waarskuwing daarstel, maar ook wat andersins ‘n bydrae kan maak wat boere kan oorweeg om hulself, die werkers en hulle besittings te beskerm.

 

Instansies wat reken hulle het ‘n produk wat oorweeg behoort te word,  word versoek om besonderhede daarvan oor spesifiek die aanwending en werking en ook die prys vir TLU SA aan te stuur.  Hierdie produkte sal per kategorie tot die beskikking van boere gestel word vir oorweging om beter na hul eie veiligheid om te sien.

Besonderhede kan gestuur word na Hierdie e-posadres word van Spambotte beskerm. Jy moet JavaScript ontsper om dit te lees.

 

 

Mediaverklaring: Rommelstatus en Voedselpryse

 

Die feit dat die nuwe Minister van Finansies redelik ongeërg voorkom oor die land se pas verworwe rommelstatus, en die feit dat pres. Zuma nie daaroor wil praat nie, is skokkend en dui op ‘n absolute ongeërgdheid oor die lot van die verbruikers en die armes van die land, sê die President van TLU SA, mnr. Louis Meintjes.

 

“Toe mnr. Zuma sy kabinetskommeling aangekondig het, het hy in sy verklaring gesê dit sal help om radikale ekonomiese transformasie te bevorder. Nou sien ons eerstehands wat die uitkoms is van mnr. Zuma en sy regering se radikale ekonomiese transformasie, wat beslis nie tot voordeel van die verbruikers en die armes is nie,” sê mnr. Meintjes.

 

“TLU SA wil dit nou baie duidelik op rekord plaas dat die boere nie geblameer gaan word as voedselpryse styg as gevolg van die land se rommelstatus nie. Die boere weier om nog ‘n beskuldiging teen hulle te kry, nadat hulle kwaadwillig en ongegrond beskuldig word dat hulle hul grond gesteel het.

 

“Voedselpryse gaan styg, maar die blaam daarvoor sal vierkantig voor mnr. Zuma en sy radikale ekonomiese transformasiespan gelê word. Hy en sy regering sal moet verduidelik hoe dit gebeur,” sê mnr. Meintjes.

 

Mediaverklaring: Nuwe Minister van Polisie

 

Die passie wat die nuwe Minister van Polisie, Fikile Mbalula, vir die lede van die polisie openbaar, is lofwaardig, en dit is goed dat hy hulle aanmoedig om vuur met vuur te beantwoord. “Dit is die enigste manier waarop die land se misdadigers die boodskap sal kry dat hulle hul rieme gaan styfloop,” sê mnr. Henry Geldenhuys, Adjunk-President van TLU SA en ook Voorsitter van die Veiligheidskomitee.

 

“Waar ons alle simpatie het met die feit dat polisielede daagliks vermoor word, wil ons die Minister daarop wys dat daar per kapita van die bevolking, meer boere in Suid-Afrika vermoor word, en dat om ‘n boer in die land te wees, volgens daardie statistiek selfs gevaarliker is as om ‘n polisielid te wees.

 

“Daarom wil ons die Minister vra dat die boeregemeenskap en die polisie mekaar sal ondersteun tot wedersydse voordeel en veiligheid, en dat plaasaanvallers insgelyks met vuur beantwoord sal word as hulle vuur wil uitdeel,” sê mnr. Geldenhuys.

 

Taal/Language